y demeura fort long temps, et en fin revint courant au lieu du sacrifice, où le druide et tous ceux qui y avoient assistez, l’attendoient à genoux, et, la teste nue, supplioient Teutates d’avoir leurs veux agreables. Et d’abord qu’elle fut arrivée, prenant l’un des coins de l’autel, et se levant sur le haut des pieds, les cheveux espars et herissez, elle profera d’une voix toute changée telles parolles.
Oracle
A vous, sage Adamàs, le Ciel l’a destiné,
Surmontez par prudence
Et l’amour et l’enfance.
Vous le devez ainsi, puis qu’il est ordonné,
Qu’obtenant sa maistresse,
Contente pour jamais sera vostre vieillesse.
Adamas, apres avoir remercié Taramis et supplié qu’il luy fist bien entendre sa volonté, de peur que par ignorance il n’y contrevint, partit de ce lieu, tout resolu d’assister Cladon en tout ce qu’il pourroit, puis que le dieu luy promettoit une vieillesse contente, quand ce berger possederoit sa maistresse. Il avoit bien desja une bonne volonté envers luy, tant à cause de la proximité qui estoit entre eux, que
