du cœur et la veue qui sembloit estre attachée sur ce beau visage. Mais il luy advint lors comme à ces personnes qui ont longuement demeuré dans des profondes tenebres, et qui sont tout à coup portées aux plus clairs rayons du soleil ; car tout ainsi qu’elles demeurent esblouyes par trop de clarté, de mesme pour avoir trop de contentement, il n’en pouvoit jouyr d’un seul, les ayant eu tout à coup, et venant de quitter l’obscurité de ses desplaisirs.
Quelque temps apres, ayant repris un peu plus de force, il commença de considerer ce qu’il voyoit, tantost regardant ce visage aymé, tantost le sein de qui les thresors ne luy avoit jamais esté descouvers, et sans se pouvoir saouler de considerer toutes ces beautez, il eust voulu, comme un nouvel Argus, avoir tout le corps couvert d’yeux. Mais lors qu’il estoit en cette agreable contemplation, voilà sa pensée qui luy represente incontinent un souvenir qui luy trouble toute sa joye. Retire-toy, luy disoit-elle, retire-toy, infortuné berger, de ce lieu bien-heureux, et qu’il ne soit point d’avantage profané par tes yeux. As-tu desja mis en oubly la deffence qui t’a esté faicte ? ne sçais-tu qu’il ne t’est pas permis de te presenter devant ses yeux ? Et peux-tu mettre en oubly ce commandement, ou si tu t’en souviens, y peux-tu contrevenir ? Il se retira les bras croisez et
