temps, puis qu’il semble qu’Alexis y reprend le bon visage que la maladie luy avoit osté. Autrement, si nous n’usons de cet artifice, elles pourroient entrer en doute de quelque chose, et il n’est pas peut-estre encore temps que nostre dessein se descouvre.
Adamas qui n’avoit point pris garde au desguisement d’Alexis, s’estonna de l’avoir luy-mesme mescogneue, et y ayant quelque temps pensé, trouva bonne ceste opinion. Mais Alexis encores beaucoup meilleure, lors qu’elle en fut advertie, tant parce qu’elle jugeoit bien que Galathée le recognoistroit, et elle eust mieux aimé la mort, que de retourner entre ses mains, que pour le desplaisir qu’elle auroit de perdre si tost les extremes contentemens qu’elle possedoit aupres de sa bergere, de laquelle les baisers et les caresses ne pouvoient que luy estre tres-agreables, encores qu’elle ne les receust qu’au nom d’Alexis, se contentant en quelque sorte, puis que Celadon en estoit le porteur.
Cela fut cause que tous trois y consentans, la chose fut bien promptement resolue, et en mesme temps la nouvelle bergere se meslant parmy la troupe, quoy que Hylas eust bien souvent les yeux sur elle, si se desroba-t’elle enfin, et de luy, et de tous les autres, et s’alla renfermer dans sa chambre, où se deshabillant, non pas sans baiser mille fois chaque piece de l’habit qu’elle s’osta de dessus, elle se mit dans le lict apres
