commencé et leurs armes estoient en plusieurs lieux rompues et desclouées, lors que Argantée se ressentit un peu las, et commença de n’aller plus si legerement, ny de frapper de si grands coups. Au contraire, Damon sembloit non seulement de se maintenir tousjours aussi frais, mais de redoubler et sa force et sa legereté, ce qui estonna grandement Polemas, mais plus encores Argantée qui, en son coeur, estima beaucoup plus son ennemy qu’il n’avoit faict. Mais peu apres que l’espée de l’estranger atteignoit presque à tous les coups sur la chair, on vid entierement affaiblir Argantée, fust pour la perte du sang, fust pour les incommoditez des blesseures qui estoient grandes.
Alors Polemas se repentoit à bon escient de n’avoir empesché ce combat, et eust bien voulu que quelque bon demon eust inspiré Galathée pour l’interrompre. Elle qui jugea bien le desplaisir qu’il en ressentoit, encores qu’elle ne l’aymast point, voulut toutesfois luy donner ceste satisfaction pour le respect du service qu’il faisoit à sa mere. Et ne jugeant pas qu’elle peust mieux separer ces chevaliers que les en prier elle-mesme, elle mit pied à terre, et avec une grande quantité de ses nymphes, s’approcha des combattans, à l’heure qu’Argantée, ne se pouvant plus soustenir, estoit tombé sur un genouil, et sembloit qu’à la venue de ces belles nymphes, il s’estoit mis expres à genoux pour leur demander pardon
