Je ne m’en tourmenterois pas :
En retournant dans ma patrie,
J’eusse fait quelque menterie,
J’eusse dit quelque fausseté,
Que c’eust esté la pauvreté
Et le manquement de finance
Où chacun avoit veu la France
Qui m’eut fait revoir mon pays ;
Et du Danube au Tanaïs,
On auroit cru, par ma sortie,
Que j’eusse quitté la partie,
Au lieu que l’on voit clairement
Que nous sortons honteusement.
Encor pour vous, Poinct de Raguse,
Vous qui n’estes pas une buse,
Il est bon, crainte d’attentat,
D’en vouloir purger un estat.
Les gens aussy fins que vous estes
Ne sont bons que, comme vous faites,
Pour ruiner tous les estats ;
Mais pour nous autres Poincts, hélas !
Et vous, Aurillac ou Venise,
Si nous plions nostre valise,
Et si l’on nous presse si fort,
C’est, je vous jure, bien à tort.
Les autres parlèrent à leur tour à peu près aussi douloureusement que le Poinct de Gênes, lorsque, d’un autre costé, les Broderies ayant esté rendre visite aux Dentelles d’Angleterre, une vieille Broderie d’or, qui avoit desjà veu un autre decry, et qui, ne sçachant plus que devenir, s’estoit mise en tour de
