roi et devant tote l’asemblée des princes, l’acuserent li Baivier de traïson et de conspiration contre son seigneur, dont il devoit avoir le chief trenchié selonc les loys. Si l’escusoient en ce cas, et disoient que il avoit ce fait puis que li rois se fu partiz de Baiviere, et puis que il li ot faite feuté et homage et asseurée par ostages. Car, si com il disoient, il s’estoit aliez aus Huns contre le roi et les avoit amenez à ce que il feissent bataille contre le roi et contre les François ; si devoit avoir ce fait par le conseil Lubbierge[1], sa fame, qui ot esté fille Desier le roi de Pavie, car ele haoit trop François pour l’essil et por la destruction de son pere, et sanz faille, ce estoit veritez dont il l’acusoient, si come la fins le prova en cele année meismes. De mainz autres cas l’acusoient, et en faiz et en diz, qui ne pooient estre ne dit ne fait par nul home qui ne fust apertement anemis du roi et des François. Dampnez fu à la parfin de toz les barons du concile du chief perdant, por ce que il fu devant toz convaincuz des cas dont il estoit accusez ; mes la debonaireté le roi le delivra, tost fust-il jugiez à mort. Son habit li mua et le tondi en un mostier, lui et Theodone, son fil. Là vesqui ausi religieusement, come il i entra debonairement et devotement. Tuit li Baivier, qui orent esté consentant et parçonier de son meffait, furent dampné par essil et envoié en divers liex. En poi de tens après, aparut bien la traïson, car li Hun, à cui il avoit faites aliances, parfirent ce que il li avoient promis. Tant assemblerent de gens que il firent
- ↑ Liutberge, fille de Didier, roi des Lombars, que Tassillon avait épousée en 763.
