[1]Incidence. — Orgelle[2] est une citez qui est assise ou plus haut lieu des monz de Pyrene. Li evesques de cele cité avoit non Felix[3] ; si estoit Espagneus de nation. A li se conseilla Elipanz[4], li arcevesques de Tholete, par lettres, et li demanda que il sentoit de l’umanité Nostre Seigneur Jhesu Crist ; savoir mon se on le devoit croire selonc ce que il estoit propres hons, ou selonc ce que il estoit fiuz adoptius de Dieu le pere ? Moult folement et moult fronteusement[5] li demanda ceste chose, et si ne li pronunça pas tant seulement fil adoptif contre l’anciene doctrine de la foi de sainte Eglise, ançois en compila livres que il envoia à cel evesque, par quoi il s’efforçoit moult durement de defendre cele heresie et sa mauvese opinion. Pour ceste chose, fu mandez au palais ; là fu s’error recitée ou concile des evesques qui pour ceste chose i estoient assemblé. Convaincuz fu de s’error et de s’eresie. A Rome l’envoia li rois à l’apostoile Adrien, qui dampna lui et sa fause doctrine et puis le renvoia à sa cité[6].
- ↑ Annales d’Éginhard, année 792.
- ↑ Orgelle, auj. Urgel ou la Seu de Urgel, Espagne, prov. de Lerida.
- ↑ Félix, auteur de l’hérésie connue sous le nom d’Adoptianisme, occupa le siège d’Urgel de 783 à 799 et mourut en 818. Sa doctrine fut successivement condamnée par les conciles de Narbonne (791), de Ratisbonne (792), de Francfort (794) et enfin d’Aix-la-Chapelle (799). À la suite de ce dernier, il fut déposé et relégué à Lyon.
- ↑ Élipand occupa le siège de Tolède depuis l’année 783 environ jusqu’à sa mort survenue vers l’année 808.
- ↑ Fronteusement, hardiment.
- ↑ C’est à la suite du concile de Ratisbonne que Félix fut envoyé au pape Adrien Ier, qui le renvoya à Urgel après abjuration.
