par Frise, ot esté entrepris à un destroit qui avoit non Rihustre[1]. Là avoient sofert estor par les Saines, et au darrenier avoient-il esté desconfit. Quant li rois oï ces noveles, il en fist mains de semblant que il pot, et fainst le domache par la noblece de son cuer ; et pour plus hastivement prendre venjance de ses anemis qui ce li avoient fait, il lessa l’apareil et le propos que il avoit d’aler en Pannonie sor les Huns. Aucun de sa gent li firent entendant que il avoient esprové que ce seroit ses preuz et ses avancemenz que il feist faire uns larges fossez entre ii fluns ; si avoit non li uns Radence[2] et li autres Halomore[3], et fussent cil fossé si large et si parfont que il peussent porter navie de la Dynoe ou Rim, car li uns de ces fluns chaoit en la Dynoe. Li rois vint à ce lieu o tot son ost, cele ovre commença et i fist metre moult grant plenté d’ovriers. Tot le mois de septembre mist-on à faire ces fossez entre ces ii fluns ; si orent ii mile pas de lonc et ccc de large. Riens ne valut cele besoigne à la fin, car l’ovre ne se pot tenir fermement pour la terre qui estoit mole et evace de sa nature, et maesmement pour les continuez plouages qui furent en ce point ; et ce que li ovrier gitoient amont en ii jors ou en iii, tout recoloit aval en une houre de nuit.
- ↑ Rihustre ; on a dans le texte : in pago Hriustri juxta Wisuram fluvium. Ce serait, d’après Pertz, Mon. Germ. hist., Scriptores, t. I, p. 178, note 13, le pays de Rüstringen, ancien district du grand-duché d’Oldenbourg, situé à l’ouest du golfe de Jade.
- ↑ Radence (Radantia), la Rednitz, rivière de Bavière, qui après s’être unie à la Pegnitz prend le nom de Regnitz, et se jette dans le Mein près de Bamberg.
- ↑ Halomore, auj. l’Altmühl, affluent de gauche du Danube, se jette dans ce fleuve à Kelheim.
