[1]Li empereres apareilla navie contre les Normanz, et fist faire nés et autres vaissaus delez les fluns de Galle et d’Alemagne qui chient en la mer devers septentrion. Et pour ce que cele gent s’embatoient sovent es marches de France parmi les flueves, fist-il clorre et garnir de fortereces les porz et les entrées des flueves, que cele gent ne autre robeor n’i peussent entrer. Ce meismes fist-il en la province de Narbone, sor les rivages des flueves par devers miedi et par tot le rivage d’Ythalie jusques à Rome, pour les Mors d’Espaigne, qui ja avoient apareillié navie pour ces contrées destruire. Et par ce, garanti-il touz ces païs de gries domages, Lombardie des Mors et France et Alemagne des Normanz, qui onques en son tens domage ne li firent, fors que tant que li Mor destruistrent une foiz une cité d’Etrurie[2] qui a non Cencelles, et li Normant, en Frise aucunes isles qui sont près du rivage de France et d’Alemagne.
