quant il vindrent au lieu, il troverent tout ensi com on lor avoit dit ; si avant vindrent que l’on pot plainement choisir les granz richeces qui là estoient amassées. Lors apela Constantins li empereres d’Orient, Karlemainne l’empereor de France, et li dist en tel maniere : « Sire, chiers amis, rois de France et empereres augustes, je te requier humblement, par amor et par charité, que tu et li oz pregnoiz et eslisiez à vostre plesir de ces richeces qui, pour vous et pour voz genz, sont ci amassées ; et bien me plaist encores que vous les pregniez toutes. » Lors li respondi li empereres Karlemainnes, que ce ne feroit-il en nule maniere, car il et sa gent estoient là venu pour les celestiaus choses aquerre, non mie pour terrienes richeces, et que il avoient souferz de bon cuer les travauz de la voie pour la grâce Nostre Seigneur aquerre, non mie pour la gloire de ce monde.
En tele maniere estrivoient li dui emperere en contenz de charité et d’amor. Li uns ne cessoit d’amonester l’autre que il preist de ses richeces en charité ; li autres se defendoit que il ne brisast son propos. Li empereres d’Orient li metoit au devant que grant honte li feroit à li et à sa gent et que il ne le feroit pas sagement, se il ne prenoit aucune chose et se il s’en retornoit ensi en France sanz aucuns dons. Et puis, il disoit après que il covenoit que il preist aucuns joiaus, non mie pour loier de son travail, mès pour monstrer aus genz de son païs, quant il seroit retornez, en signe et en tesmoignage de la grâce et de la misericorde Nostre Seigneur, et que il eust en ces parties esté. Et sanz faille, li empereres Karlemainnes avoit moult pensé la nuit devant, si come il dist puis
