de cuer. Au matin, commença à raconter à touz ceus qui oïr le voloient cele avision. Tost fu espandue partout cele novele ; et tandis come li oz estoit en bruit et en murmure de cele chose, horribles voiz furent oïes en l’air soudainement, droit sor celui qui l’avision contoit, et sembloit que ce fussent uslemenz de leus et ruiemenz de lyons, et tot maintenant le ravirent li deable en la presence de touz ceus qui entor lui estoient. Par iiii jors fu quis de genz à cheval par montagnes et par valées ; mès il ne pot estre trovez. Entor xii jors après que ce fu avenu, chevauchoit li oz parmi la terre de Navarre ; lors fu li cors de li trovez par aventure touz defroissiez sor le coperon d’un sauz[1], à iiii jornées de la devant dite cité. A cel eure que li deable le ravirent, il le porterent en haut, en l’air, par l’espace de iii liues par devers la mer ; là le jeterent, et l’âme de li porterent es paines d’enfer. Pour ce, sachent tuit cil qui les testamenz des morz retienent en lor propres us, que il se dampnent perpetuement.
[2]Karlemaines et li dux Miles d’Angliers, qui de ses oz estoit conduisierres, commencierent à querre Aygolant parmi Espagne. Tant et si sagement le quistrent, que il le troverent en un païs qui est apelez la Terre dse Chans[3], sor un flueve qui est nomez Cheia[4], en mi une praerie qui siet en un plain grant et large. En ce maime lieu, fonda puis Karlemaines i eglise en l’onor
- ↑ « Sor le coperon d’un sauz », sur le sommet d’un rocher, « in cujusdam silicis fastigio ».
- ↑ Turpini historia Karoli magni, chap. viii.
- ↑ « In terra quæ dicitur de Campis », probablement la Tierra de Campos, qui s’étend sur les provinces actuelles de Zamora, de Valladolid et de Palencia.
- ↑ La Cea, affluent de l’Esla.
