[1]L’andemain, en droit l’eure de tierce, vint Aygolant à Karlemaine pour baptesme recevoir. A l’eure que il vint, estoit Karlemaine et sa gent assis au mengier. Tout maintenant que il le vit seoir à sa table, et maintes autres tables apareilliés entor li, et vit ceus qui manjoient en divers habiz ; les uns en habit de chevaliers ; les autres en habit d’evesques ; les autres en habit de moines ; les autres en habit de chanoines reulez[2] et les autres en habit de clers. Il li demanda de chascune ordre par li et quiex genz ce estoient.
« Ceus », dist Karlemaines, « que tu voiz vestuz de riches dras touz d’une color, ce sont li evesque et li prestre de nostre loy, qui nous preechent et nous esponent[3] les commandemenz Nostre Seigneur. Si nous absolent de noz pechiez et nous donent la beneïçon Nostre Seigneur. Ceus que tu voiz en noir habit, ce sont moine et abbé qui sont plus sainte gent que li autre ; si ne cessent de proier la divine majesté pour nous. Ceus que tu voiz après, qui sont en blanc habit, il sont apelé chanoine reulé, qui vivent selonc la reule des mellors sains et proient ausi pour nous et chantent messes et matines et heures pour l’estat de nostre foi. »
Entre les autres choses regarda Aygolant d’autre part, et vit xiii povres[4], vestuz de povres dras, qui menjoient à terre sanz table et sanz nape ; si avoient poi à mengier et à boivre. Lors demanda à Karlemaine quiex genz ce estoient. « Ce sont », dist-il, « les genz
