valier cors à cors. Premierement i envoia Karlemaines Ogier le Danois. Quant Fernaguz le vit tout seul ou champ, il s’en ala tout belement delez lui, à la main destre le prist et l’ambraça a toutes ses armes et l’emporta ou chastel devant touz, ausi legierement come il feist une berbiz. Si granz estoit que il avoit xii coudes de lonc, sa face i coude, ses nés une paume, ses braz et ses cuisses chascuns iiii cuetes[1] et li doit de ses mains iii pognies de lonc.
Après Ogier i ala Renauz d’Aubeespine, et li geanz le prist a un seul braz et l’emporta en sa chartre. Après, i alerent Costantins, li prevoz de Rome, et Hoiaus, li cuens de Nantes, et il les saisi a ii braz, en ii ensemble, et les enporta en chartre[2]. Après i furent envoié xx chevalier des plus puissanz de l’ost, et li geant les emporta toz ii et ii en la cité et les mist en sa chartre. Quant li empereres vit la force du geant, il n’i osa plus nuli envoier ; si estoit toz li oz esbahiz des merveilles que cil fesoit.
Rolant, qui ainc nul home ne douta, s’en vint lors à Karlemaine et li requist la bataille contre Fernagu, et li empereres, qui de li se douta, la li otroia a granz proieres. Rolant s’arma et ala contre lui et il le vit venir ; il ala vers lui et le prist tantost a la main destre et le leva legierement sor le col du cheval. En ce que il l’emportoit vers la cité, Rolant le prist par le men-
- ↑ Cuetes, coudes.
- ↑ Dans le royal ms. 16 G VI, fol. 170 vo du Brit. Mus., cette phrase est ainsi donnée en note : « Après ce, Charlemaigne y envoia Constantin et Olles le conte. Et lors, le jaiant en prist un soubz son essel, la destre, et l’autre dessoubs la senestre, et les emporta touz deuz en la cité, et en chartre les mist. »
