Li iiii parole coment li dui frere partirent le roiaume après la mort lor pere, et de sa premiere bataille que il fist en Aquitaine, coment li rois Desiers de Pavie fu pris et envoiez en essil, et du privilege que li apostoiles Adriens dona à la corone de France.
Li v, coment il desconfi les Saines qui estoient entré en France, et coment il ostoia en Saisoigne pour aus destruire. Après, coment Ragauz, un de ses ballis de Lombardie, se revela contre lui, et de la justice que il en fist. Après, coment il mut derechief contre les Saines et coment il les desconfist et fist baptizier.
Li vi, coment il mut derechief en Saisoigne pour les Saines humilier. Après, coment il ostoia en Espagne par l’enortement d’un prince sarrazin ; coment il prist Pampelune et maintes autres citez et d’un poi de meschief qui li avint au retor ; coment li Saine furent occis par les François orientiex, et coment il mut derechief en Saisoigne.
Li vii parole coment li rois ala à Rome visiter les Apostres, et coment li papes Adriens le reçut honorablement et corona ses ii fiuz le jor de Pasques, Pepin, l’ainé, du roiaume de Lombardie, et Looys, le mainné, du roiaume d’Aquitaine, et puis coment Thassiles, li dux de Baiviere, li fist homage et coment ses gens furent desconfit en Saisoigne.
Li viii, coment il mut derechief en Saisoigne et coment il mena les Saines par ii foiz à soveraine desconfiture ; de la mort la roine Hildegarde ; des espousailles la roine Fastrade ; de la mort sa mere la roine Berte ; coment il mut en Saisoigne par iii foiz ou par iiii ; coment il se vencha des François orientiex qui contre li s’estoient revelé par mauvais conseil.
