vers Remerimont, par Vouge trespassa et se deporta là une piece du tens en pescheries et en chaces de bois[1]. Son fil Lothaire, qui à lui estoit venuz, envoia en Ythalie.
Vers le mois de septembre tint parlement en Theodone ; à cele assemblée vindrent iii messagers de par les Sarrazins d’outre mer. De ces iii, furent li dui Sarrazins et li tierz, crestiens. Pais et amor requeroient ; divers presenz aportoient d’espèces aromatiques et de dras de soie. Ce que il quistrent leur fu otroié, congié pristrent et puis s’en retornerent. A ce parlement revint Berarz qui pour la paor des traiteurs s’en estoit fuiz en Espagne. A l’empereor vint et dist que il estoit touz prez de soi purgier et de monstrer par son cors et par ses armes, selonc la costume de France, que il n’avoit corpés ou cas que on li avoit sus mis ; se nus estoit qui de ce le vosist accuser, quis[2] fu li accusierres ; mais il ne pot estre trovez. Et pour ce que paroles et fumée ot de ce esté, il se purja par sairement.
A son fil Pepin, ot li empereres commandé que il fust à ce parlement ; mais il ne vint à cort jusques a tant que il fu failliz[3] ; dont li peres fu corrociez. Et pour ce que il le voloit chastoier et reprendre de ceste inobedience et d’aucunes autres mauveses mors qui en li estoient, li commanda que il demorast ovec lui. Jusques à la Nativité le detint ; mais cil qui pas n’i demoroit
