et de Belge, fil et serjant et deciple de vostre sainte auctorité, nous nous dolons par grant compassion et plorons pour les plaies et pour les gries que li mauvais menistre et fil du deable ont faiz à nostre mere et maistresse de toutes eglises, l’Eglise de Rome, et soustenons vostre jugement, et nous i consentons de cuer et de bouche et de voiz et à la sentence que vous avez donée sor eus et sor leur aides, et selonc les droiz des canons qui furent establi et doné de voz antecessors. Et nous, qui sommes sacré par la grâce du Saint Esperit à l’ordre de prestre et à la dignité d’evesque, les ferrons[1] du glaive du Saint Esperit qui est la parole Dieu ; c’est asavoir ausi comme vous les avez escommeniez, nous les tenons pour escommeniez, et ausi come vous les avez dejetez de sainte Eglise, nous les en dejetons, et ceus qui à satiffation vorront venir, qui seront asous de vostre auctorité et par vous seront receu en sainte Eglise selonc les canons, nous les tendrons pour assous et pour fiuz de sainte Eglise. Et tout ausi com il avint jadis des plaies d’Egypte, selonc ce que nous trovons en la sainte Escriture, que il n’i avoit maison où il ne jeust un mort, ne nul n’en i avoit qui peust l’autre conseillier, pour ce que chascuns avoit assez à plorer en sa maison, ausi est-il de nous evesques, que chascuns a assez à plorer en s’eglise ; et pour ce, nous tuit, vous prions que vous nous secorez de vostre auctorité, et vous requerons que vous establissiez et confermez un chapistre par quoi nous soions si fort et si garni par l’auctorité de l’Eglise de Rome, que nous nous puissons viguereusement defendre contre
- ↑ Royal ms. 16 G VI, fol. 136 vo, « et les tresperçons ».
