Au noviau tens se parti li empereres et s’en ala en son palais de Hangelihan[1] ; là vint à li li poples et li baron de son empire ; si oï les noveles de son ost que il avoit envoié en Pannonie contre Leudevit[2]. Si demora ceste besoigne sanz perfection, et pour ce qu’ele fu ensi entrelessié sanz mener à fin, Leudevit monta en si grant orguel que il manda par ses messages à l’empereor que se il voloit recevoir tiex conditions com il li mandoit, volentiers li obeïroit ausi com il fesoit devant. Li empereres out en despit et ses messages et ses mandemenz, ne pas ne reçut ses conditions, et Leudeviz qui ensi demora en sa desloiauté atraoit à li touz ceus que il pooit contre l’empereor et s’acompagnoit à touz ceux que il cuidoit qui eussent mal cuer vers lui. Un petit après ce que li oz fu retornez de Pannonie et que Leudeviz estoit en tel point com vous avez oï, Kadolac, li dus d’Aquilée, morut. Après lui, fu dus uns autres qui avoit non Baudris[3], et quant cil dus Baudris fu venuz ou païs et il entroit en la contrée, il trova l’ost Leudevit deseur un flum qui a non Draves[4], et tout eust-il poi de gent ovec lui, il leur corut sus, assez en occist et les autres chaça hors de la contrée. Et quant Leudevit fu ensi desconfiz et chaciez, il se rapareilla à bataille contre Borna, le duc de Dalmacie, seur le flum de Calapie[5]. Et quant Borna s’aperçut que li Go-
- ↑ Hengelimheim (Vita Hludowici), auj. Ingelheim.
- ↑ Cf. Éginhard, Annales, année 819.
- ↑ Ce Baudry, duc de Frioul, fut destitué en 828 pour avoir, par lâcheté, permis aux Bulgares de ravager impunément les confins de la Pannonie supérieure (Vita Hludowici imperatoris, chap. xlii ; cf. Éginhard, Annales, année 828).
- ↑ La Drave.
- ↑ Calapie, auj. la Kulpa, rivière de Croatie, affluent de la Save, rive droite.
