crestiens espanduz par la terre d’Oriant, et moult de belles eglises hautes et anciennes qui ont esté destruites par les Tartarins avant qu’il feussent crestien ; dont il est avenu que les crestiens d’Oriant qui s’en estoient fouis en divers lieus pour la paour des Tartarins, sont venu de nouvel au roy Cham qui maintenant regne ; lesquiex il a receuz a grant honneur et leur a donné franchise, et a fait crier à ban que nus ne soit si hardiz qui leur face grief, ne en parole ne en fait. En la terre d’Ynde, que saint Thomas l’apostre converti à la foy crestienne, avoit i roy crestien que Sarrazin avoient desherité, et tolu la greigneur partie de sa terre. Si vit bien qu’il perdroit le remenant s’il n’avoit aide ; si manda au grant roy de Tharse qu’il li vousist aidier sa terre à secorre contre Sarrazins, et volentiers li feroit homage et devendroit ses hom. Si tost comme le roy de Tharse sot le propos du roy d’Ynde, il manda les plus puissanz princes de sa terre et leur commanda qu’il alassent secorre le roy d’Inde et sa terre que Sarrazins avoient destruite, et qu’il feussent en l’ayde des crestiens de tout leur pooir, et qu’il les amassent comme leur freres. Cil se mistrent atout grant compagnie de Tartarins à la voie et vindrent en Ynde. Le roy les reçut a grant joie et les ala saluer parmi les tentes, et puis s’en retorna à sa gent et assambla son ost avoec l’ost des Tartarins, et s’en vint contre Sarrazins qui l’atendirent en champ, car il ne cuidierent pas qu’il eust Tartarins en s’aide. Si furent touz desconfis et mis à destruicion, et veismes plus de xl mille esclaves que le roy commanda à vendre. Et sachiez, très douce suer chiere, que nous estions present devant le roy de Tharse quant les messages le pape vindrent de-
