apert, que ceulz de Tunes ne s’en aperceussent de tel domage qui leur estoit avenu.
[1]Si comme il estoient en tel point, il aperçurent la navie au roy de Cezille qui venoit najant a grant force de gent par mer. Si commanda que quant l’en preist terre, que l’en sonnast trompes et buisines et araines, si que son frere le saint roy et les barons en fussent esbaudiz et liez de sa venue. Si comme le roy de Cecille prenoit son port, si se merveilla moult pourquoy les genz de l’ost estoient si mat et si pesanz et qu’il ne li firent point belle chiere ; car en l’eure qu’il issoit de sa navie, son frere rendi son esperit à Dieu. Si demanda à aucuns que ce pooit estre ? et il li fu dit que son frere le roy de France se mouroit et qu’il se hastast tost, et que l’en ne cuidoit pas que il le peust trouver en vie. Quant le roy de Cecille oy la nouvelle, si se pourpensa et adverti que se il faisoit semblant de doleur ne de tristesce, que la compaignie de l’ost s’en porroit trop former esmaier[2] et espoenter et cheoir en desesperance ; et se les Sarrazins s’en apercevoient, il leur donroit matiere d’assaillir. Pour ceste chose, il fist la meilleur chiere et la plus liée que il pot à ceulz qu’il encontra, et vint aussi liéement en l’ost comme s’il alast à unes noces, et se hasta moult de venir à son frere, si le trouva tout chaut, car l’esperit s’en estoit tout maintenant issu. Tout maintenant que il vit son frere deffiné, il se mist à genouz et recommanda l’ame de son frere en depriant à Nostre Seigneur que il eust l’ame de li, et li couvrirent les iex de lermes.
