les autres barons de l’ost, et issirent de leurs herberges bien et hardiement, et se rengierent parmi le champ, et ordenerent leurs batailles. Si comme il devoient aler ne ne doubtoient riens fors que les Sarrazins ne s’enfuissent sanz ferir et sanz lancier, et mistrent les arbalestriers au devant et les gens de pié, et ordenerent après qui seroit premier et qui secont et qui le tiers, selonc ce qu’il leur sambloit bon et profitable à aler contre leurs anemis. Et pour ce que les Sarrazins ne venissent de costé ou d’autre part aus herberges et aus tentes, il laissierent le conte d’Alençon frere le roy de France avec toute sa gent et le maistre de l’Ospital. L’oriflambe Saint Denis fu contremont drescié, dont sorent certainement François qui c’estoit certain signe de combatre à leurs adversaires se il ne fuioient.
Quant les Sarrazins virent l’ost des crestiens si noblement armez et si richement, si en furent touz esbahiz, et orent si grant paour qu’il s’enfuirent droit à leurs tentes et à leurs paveillons au plus tost que il porent, ne ne furent onques si hardiz qu’il osassent ilec demourer, ainz s’en passerent outre jusques à la cité de Tunes de tiex en y ot. Quant les François virent ce, si firent crier à ban, de par le roy de France, que nul ne fust si osé qui tendist la main au gaaing, jusques a tant que l’en sauroit la convine et l’estat des Sarrazins et qu’il eussent souveraine victoire. Car aucune foiz avoient esté deceuz les crestiens quant il couroient au gaaing ; leurs anemis les espioient tant qu’il estoient troussiez, puis leur couroient sus et les occioient à leur volenté.
Le roy de France et les autres barons passerent tout outre parmi les tentes des Sarrazins et les chacierent
