par i mardi, veille saint Berthelemi[1], au point du jour, les deus mareschaux et messire Robert de Flandres par devers le terrouer de Bergues, et bouterent le feu, et pour ce les cuidirent traire jus hors du mont ; mais onques n’en firent conte, ains vindrent toute jour au pié du mont paleter aus gens du roy ; et les chevaliers monterent sus leurs roncins en leurs purs auquetons pour veoir le paleteis ; et quant il veoient aucun blescié qui bien avoit fait la besoigne, si en rioient et moquoient.
Quant les mareschaux furent venuz de fourrer, si s’alerent aisier, car il avoient grant paine soufferte, ne onques en l’ost du roy on ne fist guet, et les grans seigneurs alerent d’une tente en l’autre pour eulz deduire en leurs belles robes.
Or vous dirons des Flamens qui estoient sus le mont de Cassel, qui s’aviserent que les mareschaux estoient moult lassez et les autres chevaliers s’esbatoient à jouer aus dés et en autres deduiz, et le roy estoit en sa tente aveques son conseil pour ordener des besoignes de sa guerre.
Les Flamens firent trois grosses batailles et vindrent
