terre. Quant messire Jehan de Douglas qui estoit parti d’Escoce vint en Espaigne, si trouva la guerre toute ouverte entre le roy et les Sarrazins, et là fu moult noblement receu du roy, et fu mis jour de bataille. Et au jour nommé alerent les batailles l’une contre l’autre ; et commença la bataille moult crueuse, et se prouva le roy d’Espaigne de si grant vertu qu’il eust en ce jour coppé i des dois de la main. Et messire Jehan de Douglas fu feru d’une archegaie parmi le corps ; et quant il se senti navré à mort, si n’ot cure de plus vivre, et se feri en la presse des Sarrazins et ylec fu tué comme bon chevalier et bon crestien. Puis fist pais le roy d’Espaigne à dan Jehan Manuel qu’il reprist sa fille par l’acort du pape ; et puis prist à femme le roy d’Espaigne la fille au roy de Portigal[1], et fu departi de sa première femme.
[2]Item, depuis que le roy d’Angleterre et Edouart de Bailleul orent eu victoire des Escoz, et ledit roy d’Angleterre se fu parti d’Escoce et institué le devant dit Edouart en roy d’Escoce et plusseurs autres personnes à garder les forteresces qu’il avoit conquises en Escoce, comme devant est dit ; ceulz d’Escoce qui demourez estoient, firent leurs aliances tout priveement et pristrent en eulz force et vertu, et s’en alerent combatre le devant dit Edouart et les Anglois que le roy d’Angleterre avoit laissiez[3] pour garder les forte-
