Page:Viard - Grandes chroniques de France - Tome 9.djvu/212

La bibliothèque libre.
Le texte de cette page a été corrigé et est conforme au fac-similé.

gentilz hommes. Ilec ot tant de gens mors que ce fust grant pitié à veoir ; et estimoit-on bien le nombre des mors jusques près de xxxm hommes, tant d’une part que d’autre. Là fu mort messire Hue Quieret, si comme l’en dit, non obstant qu’il fust pris tout vif, si comme aucuns dient, et messire Nichole Beuchet, lequel fu pendu au mat de sa nef, en despit du roy de France. Et quant Barbevaire vit que la chose aloit à desconfiture, si se retrait à garant, et furent les nefs au roy de France perdues. Et aveques ce, les II grans nefs au roy d’Angleterre, Christofe et Edouarde, que le roy anglois avoit par avant perdues, li furent restituées. Et ainsi furent noz genz desconfiz par le roy d’Angleterre et par les Flamens, et noz nefs perdues, exceptées aucunes petites nefs qui s’en eschaperent. Et avint ceste desconfiture par l’orgueil des II admiraux, car l’un ne pooit souffrir de l’autre, et tout par envie ; et si ne vouldrent croire le conseil de Barbevaire comme devant est dit, si leur en vint mal, si comme pluseurs le tesmoignent.

Quant la chose fu finée et le roy d’Angleterre ot eue celle grant victoire, lequel roy fu navré en la cuisse, mais onques n’en voult issir de sa nef pour celle navreure. Mais toutes voies, messire Robert d’Artois et les autres barons d’Angleterre pristrent terre à l’Escluse et se reposerent ileques. Ceste bataille fu faite la veille de la Nativité monseigneur saint Jehan Baptiste, l’an de grâce M CCCXL[1].

  1. Sur la bataille de l’Écluse, qui fut livrée le 24 juin 1340 (et non le 23), voir Dufourmantelle, La marine militaire en France au commencement de la guerre de Cent ans, p. 54 à 72, extrait du Spectateur militaire, 1878 ; de la Roncière, Histoire