que on appelle le pont Hasequin[1]. Le duc se tint as chams une piece, et quant il vit que nul ne venoit, si s’en retourna à la ville. Lors fist messire Robert d’Artois deslogier son ost et trousser ses tentes et s’en vint vers Saint Omer. Ceulz de Bruges qui avoient la premiere bataille et conduisoient le charroy, s’en vindrent à une ville près de Saint Omer que on appelle Arques[2]. Mais ceulz de Furnes ne vouloient passer le Neuf-Fossé, si comme il avoient par avant dit. Quant messire Robert d’Artois vit qu’il ne vouloient aler avant, si fist courre unes nouvelles par devers eulz, que ceulz de Bruges se combatoient et que, pour Dieu il les vousissent secourre. Quant il oïrent ces nouvelles, si laissierent leur propos et s’en vindrent grant aleure vers la ville, et quant il vindrent à Arques, il trouverent ceulz de Bruges qui se logoient. Endementres qu’il se logoient, vindrent les archiers courre jusques à la porte, et porterent une baniere des armes messire Robert d’Artois, et traioient si dru vers la porte que c’estoit merveille. Quant ceulz qui à la porte estoient les virent ainsi traire, si issirent hors tout à I cop et coururent à eulz ; mais il ne les atendirent mie, ainz s’enfuirent, et ceulz de Saint Omer les chacierent jusques à la maladrerie, et ainsi paletoit-on moult souvent ; mais onques le duc ne hommes d’armes ne s’en murent. Et tant paleterent que les Flamens furent touz logiez, et quant il furent tous logiez, il bouterent le feu en la ville d’Arques et l’ardirent toute. Celle meismes journée vint le conte d’Armignac atout son
