ost en la ville[1]. Le roy de France qui avoit son ost assemblé pour aler vers Tournay, s’appensa que miex li vaudroit de soy combatre à messire Robert d’Artois que d’aler vers Tournoy ; si fist mouvoir son ost pour aler vers Saint Omer en grant haste. Les Flamens qui estoient dessus Arques aloient presque touz les jours paleter jusques aus forbours de Saint Omer, et faisoient par nuit si grant lumiere en leur ost que la lumiere resplendissoit jusques à la ville ; et si faisoient chascun jour moult grans assauls à un petit chatellet qui estoit au duc de Bourgoigne, que on appelle Ruhout[2] ; mais onques pour assaut qu’il feissent ne le porent gaaignier.
Quant messire Robert d’Artois sot que le roy de France venoit vers lui et qu’il avoit laissié Tournai, si hasta moult sa besoigne. Par I mercredi matin[3] manda touz les capitaines de son ost, et leur dist : « Seigneurs j’ay oy nouvelles que je voise vers la ville et que tantost me sera rendue. » Tantost se coururent armer et disoient l’un à l’autre. « Or tost, compains, nous bevrons encore à nuit de ces vins de Saint Omer. » Quant les batailles furent ordenées, si se avalerent de leurs tentes et vindrent le grand chemin parmi Arques vers la ville de Saint Omer. Et ou premier front devant vint messire Robert d’Artois, et avoit aveques lui II banieres d’Angleterre et touz ceulz de Bruges et les archiers, et ne s’arresterent onques jusques atant qu’il vindrent à une arbalestrée près de la maladrerie, et
