Et pourront proposer leurs raisons devant le pape, non à decision de cause ne pour donner sentence diffinitive, mais à fin de meilleur traitié et de faire pais. Et si est ordené que ceus qui seront envoiez à la court, y seront dedenz la feste de monseigneur saint Jehan Baptiste prochaine venant, afin que dedenz la Nativité de Nostre Seigneur, les choses dessus dite soient par nostre sire le pape, à l’aide de Dieu, expediées et delivrées, s’il n’avenoit que du consentement desdiz nobles le temps fust esloignié et aussi que se le pape estoit empeeschié, ou qu’il ne peust concorder les II roys. Toute voies les trives durront et seront gardées jusques au temps determiné. Et afin que les choses devant dites puissent avoir meilleur effect, sont trives ottroiées jusques à la feste saint Michiel du moys de septembre prochain venant, et de ladite feste jusques à trois ans continuement ensuians, entre les roys de France, d’Angleterre et d’Escoce, et le conte de Haynau et les Flamens et les aliez devant nommez des roys, en toutes les terres d’iceus et de leurs aliez, pour lesdites trives tenir par tout le temps dessus dit, de la date de ces lettres presentes. Et si est ordené que le roy d’Escoce et le conte de Haynau et lesdiz aliez envoieront leurs messages à la court de Rome dedenz la feste saint Jehan dessus ditte, lesquiex aient puissance de consentir et de avoir estable, en quanqu’il leur pourra touchier selon le traitié du Saint Pere le pape. Et se aucuns de eulz sont negligens ou que il ne leur chaille de envoier leurs messages comme dit est, pour ce ne sera point retardé ne empeeschié le negoce devant dit. Et que les ordenances faites devant Tournay, des trives, seront exprimées dedenz et
