et dyacre et frere jadis de monseigneur Geffroy de Malestroit, chevalier, lequel avoit esté décapité l’an derrenierement passé. Ycelui Henri avoit esté en l’office du roy, que l’en dit seigneur des requestes de l’ostel du roy. Mais après la mort de son frere, il s’en ala au roy d’Angleterre et estoit son adherent contre nostre seigneur le roy de France, en tant que en la ville de Vennes en Bretaigne il se portoit comme capitaine pour la partie du roy d’Angleterre ; lequel fu pris des François[1] et admené à Paris hastivement. Et quant il fu mis en prison, à la parfin il pria a grant instance que il fust menez devant le roy, et il li diroit merveilles et se excuseroit loyaument de ce que l’en lui imposoit. Adonc puis qu’il fu presenté au roy et l’en ot escouté et oy paciaument tout ce qu’il avoit voulu dire, noient moins il fu envoié en prison à la maison du Temple là où il avoit esté par avant et dont l’en avoit admené. Et quant il ot demouré i petit de temps, à la parfin, ou moys d’aoust il fu mis hors de prison en cote et sanz chaperon, lié par le col et par les mains et par les piez de chaiennes de fer, et assis en i tumberel sur i bois grant et large mis du travers afin que touz le peussent veoir, et ainsi fu pourmené par la ville de Paris, dès le Temple jusques au parvis devant l’eglise de Nostre Dame, et là fu baillié et laissié à l’evesque de Paris. Après ces choses, par vertu d’une commission du pape empetrée par le roy, qui moult s’efforçoit que ledit Henri fust degradé de l’ordre de dyacre et de toute autre ordre, il fu mis, par le jugement de l’eglise
- ↑ D’après la Chronique normande, p. 62, Henri de Malestroit aurait été pris à Quimper, lorsque la ville se rendit à Charles de Blois.
