choient moult diligeaument la ville de Caan et pilloient tout, et les biens qu’il avoient pilliez à Caan et es autres villes, le roy d’Angleterre envoia par sa navire tantost en Angleterre, et ardi grant partie de la ville de Caan en soy issant ; mais au fort de la ville ne fist-il onques mal ne n’i arresta point, car il ne vouloit mie perdre ses gens. Si s’en parti tantost et s’en ala vers Lizieux[1]. Et touz jours Godefroy de Harecourt aloit devant, qui tout le pays ardoit et gastoit. Après il vindrent vers Falloise[2], mais il y trouverent qui leur resista viguereusement, si se tournerent vers Roen. Et quant il oyrent que le roy de France assambloit ilec son ost, si s’en alerent au Pont de l’Arche[3]. Toute voies le roy de France y ala avant eulz. Et quant il fu entré en la ville, si manda au roy d’Angleterre, s’il vouloit avoir bataille à lui, qu’il li assignast jour à son plaisir, lequel respondi que devant Paris il se combatroit au roy de France.
Quant le roy de France oy ce, si s’en retourna à Paris et s’en vint mettre et logier en l’abbaïe Saint Germain des Pez. Ainsi comme le roy d’Angleterre s’approchoit de Paris, si vint à Vernon[4] et cuida prendre la ville ; mais l’en li resista viguereusement, si s’en partirent les Anglois et ardirent aucuns des forbours.
- ↑ Édouard III fut à Lisieux le 2 et le 3 août (J. Viard, La campagne de juillet-août 1346 et la bataille de Crécy, p. 32 et 36).
- ↑ L’armée anglaise n’alla pas à Falaise, mais passa par Duranville, le Theil-Nollent, Brionne, le Bec-Hellouin, le Neubourg, pour être le 7 août à Elbeuf et à Pont-de-l’Arche (J. Viard, op. cit., p. 36 à 38).
- ↑ Pont-de-l’Arche, Eure, arr. de Louviers, ch.-l. de cant.
- ↑ Vernon, Eure, arr. d’Évreux, ch.-l. de cant. Édouard III attaqua cette ville le 9 août (J. Viard, op. cit., p. 39 à 42).
