pour le temps demouroient en Bretaigne, devoit apliquier vers celle partie où lesdis Bretons, François et autres estoient. Et la compaignie de l’ost en laquelle le duc estoit, si comprenoit la place entre l’eglise de Nostre Dame et la porte qui est appellée la porte de Jument. Et les autres compaignies estoient environ la ville ; mais les deus devant dit nommées estoient les plus nobles. Et environ la ville avoit ix grans engins, entre lesquiex il en avoit i qui gettoit pierres de ccc pesans, et les autres gittoient en la ville, par tel maniere qu’il rompoient les maisons et tuoient les gens, les chevaux et autres bestes. Et entre les autres cops, une pierre fu gittiée dudit grant engin à une maison ou chastel, en laquelle maison, la femme du capitaine gisoit d’enfant, et estoit emprès son enfant que elle avoit eu de nouvel. Si rompi le cop de laditte pierre plus de la moitié de la maison où laditte femme estoit, si ot moult grant paour et se leva tantost toute espoentée, et vint à son mari capitaine du chastel, messire Richart Toutesham, chevalier, et li pria qu’il rendist le chastel ; mais il ne li voult acorder. Derechief fu gittée une autre pierre, de la partie où le duc estoit, et fist i pertuis en la tour où le capitaine et sa femme estoient ; mais pour ce ne le voult-il rendre. Si avint que les bonnes gens de celle terre, qui par avant avoient esté en la subjection des Anglois, pristrent fondes pendenz à bastons, et commencierent à assaillir la ville par merveilleux effort, car il estoient grant quantité, et firent loges, ville et rues en l’ost, et portoit l’en moult de biens en l’ost, et tellement que vivres estoient à très grant marchié, dont plusseurs s’en merveilloient. Touz les jours donnoient assaux à la
