ville et au chastel par très grant effort, et en tele maniere que ceulz qui estoient en la ville ne savoient que faire. Mais les noz eussent prise la ville s’il eussent voulu, car ceulz de la ville et du chastel avoient ottroié à tout rendre, leurs corps et leurs biens saufz. Si avint que le duc fu deceu par mauvais conseil, et ne voult prendre la ville jusques atant que messire Thomas Dagorn, principal capitaine des Anglois venist, et qu’il fust pris avant que l’en receust ceulz de la ville ne du chastel. Mais aucuns de l’ost au duc si firent acort aveques ceulz de la ville, qu’il seroient receuz dedenz viii jours en la forme et maniere qu’il le requeroient.
Endementres, vint messire Thomas Dagorn par devers la ville qui est appellée Karahes[1], par sentiers et par bois, a très grans ost et si celéement comme il pot, et se loge celle nuit en l’abbaïe de Begar[2], en laquelle n’avoit demouré nulz moines depuis que les Anglois estoient venuz à la Roche Deryan. Si y trouva aucuns serviteurs qui gardoient laditte abbaïe, et là entra celle nuit sanz ce que ceulz du pays ou pou le sceussent, et y soupa et son ost aveques lui, et ne fist nul mal à ceulz qu’il trouva en laditte abbaïe. Et après ce qu’il ot souppé, il s’en entra en l’eglise et fist yleques son oroison et veilla jusques à mie nuit, si comme l’en dit, et ensaigna son ost comment il assaudroient l’ost du duc, et leur donna i signe que comme il seroient en la bataille, il diroient l’un à l’autre une parole bien bas, laquelle parole je n’ay peu savoir ; et quiconques
