estoit pris, si se departirent comme touz desesperez. L’endemain, les Anglois menerent le duc par faux sentiers et par boys à une ville qui est nommée Karahes ; et d’icelle ville il le menerent à une ville qui est appellée Kamperlé[1] en laquelle ville les Anglois tenoient i très fort chastel, lequel chastel il avoient pris par force d’armes ; et en ce chastel tindrent ledit duc par l’espace de viii jours ou environ. Et de ce chastel il le firent mener à Vennes, et yleques demoura environ i an, car la mer estoit gardée en tele maniere que les Anglois ne l’osoient envoier par mer en Angleterre. Et endementres qu’il fu à Vennes, la duchesse ot congié des Anglois pour visiter le duc son seigneur. Environ la fin de l’an, il pristrent le duc et l’envoierent par mer au chastel de Brest, lequel chastel de Bretaigne est le plus prochain au royaume d’Angleterre ; car il estoit de necessité que ledit duc fust gueri de ses plaies avant que l’en le peust mener en Angleterre ou en autre lieu loing. Et après, depuis qu’il ot esté une piece oudit chastel de Brest et que le peril fu osté de li, ja soit ce qu’il ne fust pas gueri, il l’envoierent en Angleterre bien acompaignié de navire. Mais très qu’il issi dudit chastel de Brest pour estre mené en Angleterre et audit roy d’Angleterre estre presenté, il avoit en sa compaignie vii joueurs de guisternes[2], et il meismes, si comme l’en dit, commença à jouer de l’uitiesme guisterne ; et ainsi fu mené prisonnier en Angleterre, dont ce fu grant doleur et grant pitié.
Or avint, après ce que la bataille fu finée, en la-
