quelle le duc avoit esté pris et ses gens mors et desconfiz, comme dessus est dit, que les Anglois qui estoient demourez en la Roche Deryan, pristrent les armes et les despoilles, vins, chars et autres biens qui estoient en l’ost du duc et si tindrent les bonnes gens du pays en très grant misere, et ne leur laissierent rien à leur povoir, et si en tuerent une grant quantité, et aucuns en reserverent pour l’aire le labour entour le fort. Les Anglois avoient bien aperceu, comment il s’estoient asprement tenuz encontre eulz, si comme dessus est dit.
Quant ces choses orent esté ainsi faites, les Anglois orent très grant joie et furent moult liez de leur victoire, et commencierent derechief à garnir la ville et le chastel de la Roche Derian, et aucuns autres fors des biens qu’il avoient gaaigniez, et pensoient à demourer yleques bien seurement, et eulz deffendre encontre touz. Mais Nostre Seigneur ordena autrement, car le moys d’aoust ensuiant, les nobles et les non nobles de tout le pays s’assamblerent en i certain lieu, et firent et ordenerent que derechief et briefment il assaudroient la ville et le chastel de la Roche Derian, et firent supplicacion au roy de France qu’il leur voul-