que il avoit servi, et pour l’amour de lie, que il li vousist faire grâce du cors, il fu condampnés à estre pendu, et il si fu en l’an dessus dit, le jour de la saint Marc euvangelistre en avril. Et combien que cis Pierres eust esté povrez et de petit estat, ne pourquant il monta tant par ces marchiés barateus, que en mains de x ans il ot aquis tant de heritages et de meules[1] que nuns homs à pennes ne le porroit croire, dont la somme et valeur et estimacion des jouiaus, de l’or et de l’argent monnoié et à monnoier, et des biens muebles et non muebles qui furent trouvés es lieus qui siens estoient, ne fu onques seue à plain d’omme, tant estoit grant. Et tout ce ot li royz nouviaus, mès que ce qui en fu retenus privéement d’aucuns collecteurs, si com il fu dit. Et est assavoir que des jouiauz qui là furent trouvé, li rois en donna à chascun princes et barons et haus hommes renommez et à duchessez et à contessez et à dames et à damoiseilles grandement. Et est assavoir que quant ledit Pierre fu au gibet, qui nuef estoit et de pierre, et el quel nul n’avoit esté pendus devant, il congnut traïson envers le roy et les royaus et que il avoit esté consentenz en murtre fait. Par lesqueles choses il fu dessendus du gibet nuef et fu atelés au gibet viel et de là fu trainés jusques au gibet nuef que il avoit fait faire, et el quel il fu penduz, si com dit est.
[2]En cel an que li rois fu coronnés à Rains, il ot conseil avec ses barons suz le fait de ceus de Flandres. Et mesmement pour ce que le conte de Flandres avoit requis le roy que comme il feust son homme de Flandrez, et l’eust receu en foy et en hommage, et il ne poust ceus de Flandres justicier sans lui qui son seigneur estoit, qui
