lui son homme devoit aidier en ce. Si requist le roy à ses barons comment il feroit sus ce et se il iroit en Flandres, si comme le conte son homme li requeroit. Et com li unz deissent de non povoir, la prochaineté de l’iver aprochant et que l’en ne porroit pas estre prest souffissamment à tel fait parfaire, li rois avec aucuns fut de cest acort que il iroit et dist : « Qui m’amera si me suige, car vraiement je irai. » Et ainssinc chascun qui pout s’apareilla pour estre avec le roy à Arras le jour de la Magdalene. Dont li Flamans qui sorent ceste emprise en firent leur moquerie et appeloient le roy Philippe, le roy trouvé. Més li roys entendi à son fait et se recommanda à Dieu et à Nostre Dame et aus sains et auz saintes, et vint à Nostre Dame de Paris, et visita en persone les malades de la Maison Dieu, et leur fist s’aumosne de sa main, et puis vint à Saint Denis et visita les cors sains en leurs proprez lieuz où il gisoient deseur le grant autel, et i fu grant piece en devoste orroison, dont onques mès, rois de France là n’avoit esté. Et fist baillier l’oriflambe de nouvel au seigneur de Nouiers, monseigneur Mille, chevalier preuz et hardiz en tous bons fais d’armes et esprouvez. Et d’illeuc s’en ala à Chartres en grant devocion, et ainssint il mist toute s’entente et s’esperance en Dieu et en Nostre Dame et es sains, et ala en Flandrez, don li barons le sivirent après tant en grant compaignie, si que il furent à lui à Arras entour la mi aoust.
En cel an, le roy de Boesme, entour yver passé devant, estoit passez en terre de Sarazins, et prist grant païs et regions suz eus ; et en vindrent à foi de crestienté par lui pluseur, car il estoit et fu trouvés en ces fais preuz, vigreuz, hardis et entreprenans, loyaus et larges et très bons paieres, charitables et preudons, vers Dieu en bonne conscience ; et pour ce li asist en tous ses fais. Et combien que il feust ainssinques là contre les Sarazins, ne pourquant il envoia des gens d’armes de sa terre
