En cel an, entour la Saint Martin d’yver, li chansceliers qui lors estoit, selonc la commune renommée, ourgueilleus et de telle oultrceuidance, que nulz sus li n’apparoit à la court de France ne à la court du pape, comme cilz qui par sa malicieuse soutilité fasoit et empetroit et vers pape et vers roy ce que il voloit, et eslevoit et abbassoit ce que il li plaisoit ; en alant en Poyto, dont il estoit nez, chei de son cheval soudainement et morut en plain chemin, si que cil qui là estoient et encontre lui venoient, plus par doute que par amour, le virent. Et ainssinc mort vilainement, fu emportés en une chapelle que il avoit fondée ; et là fu enterrés de leues que de Poitiez. Et le sael du roy que il avoit par sa presumpcion porté avec lui fu raporté au roy à Paris. Icil chanceliers estoit nommés Jehan de Serchcemont, qui avoit esté sollempne advocat en Parlement.
En l’an mil CCC et XXIX, li roys de France envoia messages pour semondre le roy d’Engleterre pour venir faire li hommage du duchesme de Aquitene ; liquel messagez ne porrent parler au roy. Et pour ce, il firent tant que il parloient à sa mere la roine, laquelle leur dit, si com l’en disoit, que son filz estoit de roy, ne feroit pas hommage à filz de conte, et que Philippe de Valois, qui roy de France se nommoit, gardast bien que il fasoit ; et que son fil estoit plus près et plus prochain pour le royaume de France avoir que il n’estoit. Et quant li messagez oïrent d’elle responce, pour ce que il n’avoient plus terme du roy de France pour là demourer, si s’en vinrent en France et dirent au roy ce qu’il avoient veu et trouvé.
En cel an, le pape envoia partout et publia les procès que l’evesque de Riete avoit fait contre frere Piere de Carnelle qui se faisoit pape ; el quel il estoit contenu qu’il avoit esté mariez ansois qu’il entrast en religion, à une fame nommée Jehanne Mathie, par quoi il estoit
