prouvé escommenié et irregulier, et condampnez à retourner à sa fame. Et ce fu partant et à Paris et autre part publiié.
En cel an, Loys de Bavière s’en issi de Roume, quar li Roumains ne li voloient plus tenir, ne plus à lui ne à son antipape obeïr. Dont icil Roumain escriprent au pape Jehan, en souppliant que il leur pardonnast ce que fait avoient par la decepcion dudit Loys, et que à lui, et non à autre, com à leur droit pape, voloient obéir. Dont li papes Jehans, de leur requeste ot grant joie et leur pardonna debonnairement.
En cel an, la royne de France ot i filz au Bois de Vinciennez ; lequel, puis qu’il fu baptisiez, si com l’en dit d’aucuns, morut et fu enterrés chiés lez Frerez Meneurs de Paris.
En cel tempz, li roys de France envoia messagiers en Engleterre pour semondre le roy d’Engleterre sus l’onmage d’Aquitene faire au roy. Dont après pluseurs traietiers sus ce fais, li barons d’Engleterre conseillerent au roy d’Engleterre qu’il venist à honmage, et que faire le devoit et qu’il n’avoit cause ne droit el royaume de France requerir, puisque sa mere riens n’i povoit demander. Et pour ce, journée fu prise à la Trinité de venir à Amienz faire son hommage ; à laquelle journée, li rois d’Engleterre vint avec aucuns de ses barons d’Engleterre. Et comme il requerist du roy de France que il li rendist la terre de Agenois que messirez Karlez de Valois prise avoit, afin que il li feist hommage de toute la duchey, respondu li fu que celle terre jamais rendue ne li seroit, que son pere, à son vivant, fourfaite l’avoit. Et lors le roy d’Engleterre, par le conseil que il ot et qui autrement faire ne povoit, fist au roy de France hommage de la terre du duchey ; et li rois le reciut en proumetant que se il voloit riens reclamer en la ditte terre ne en autrez choses, que il li en feroit droit par les pers de France en
