ataint, car il ne se pot purgier ne excuser. Le roy, à la priere du pape Jehan qui li avoit escript qu’il le vousist espargnier, ceste fois li pardonna xviii articles qui avoient esté proposées contre li, pour chascun desquiex il avoit esté jugié digne de mort. Lequel Jourdain, metant en oubli la grâce et le benefice que le roy li avoit fait, en riens du monde ne s’amenda, mais aussi comme devant et pis encore, commença à maufaire ; c’est à savoir, roberies, homicides, efforcier femmes, vierges despuceller, estre rebelle au roy. Dont il avint que i sergant du roy qui avoit sa mace esmailliée de fleur de lis qui sont les armes de France, et la portoit avec soy comme sergant d’armes ont de coustume, il le tua de sa mace meismes[1], et ne tint conte de faire tieux mauvaistiez ne tieux fais. Il avoit, si comme on disoit, moult de mauvaise merdaille, robeurs, murtriers et telle maniere de gens qui roboient et despoulloient les bonnes gens, clers et lays, et puis li aportoient ce qu’il avoient pillé et robé. Longuement mena telle vie, tant que plaintes et clameurs derechief en vindrent au roy ; pourquoy le roy li manda qu’il se venist excuser devant lui et devant ses barons. Lequel quant il entendi le mandement vint a grant arroy à Paris et a grant orgueil ; et vindrent avec lui pluseurs contes et barons qui, en tant comme il pooient, le seurportoient et excusoient. D’autre part vindrent contre li pluseurs autres nobles hommes ; c’est à savoir le marquis d’Ancône[2] qui avoit esté
