Cette page a été validée par deux contributeurs.
Riant li prie et amoneste
Ses deus servir et faire feste.
Sains Jorge dist : « Sacrefier
M’estuet à tes deus ; fai crier
Que ta gent vieigne et là voie. »
Lors fist Daciens mult grant joie
Bien cuida que vencu l’éust,
Tot seit que son cuer ne séust.
Tot maintenant, sans faire autr’euvre,
Sains Jorge vait, la maison euvre
Où seles ymages estéent
Que li mescreant aoueréent,
Apolin, Rache, Agaba ;
Mult les honi, mult les gaba.
Apolin fist à soi venir,
Sil ne s’osa contretenir ;
Aincès issi fors de s’ymage,
Tos forcenés et plains de rage.
Li sains dist, en apert sans close :
« Es-tu Deu de chaitive chose !
