Cette page a été validée par deux contributeurs.
Sire, qui tot as en demaine
Tos ces mors en vie remaine. »
Ains que eust sa priere dite,
La vois de Deu, saint Esperite :
« Jorge, tot se que tu vodras
Demander, por veir tu auras. »
Deu oï saint Jorge à delivre,
Tos les mors fist lever et vivre ;
Si com par Esme est devisé,
Que ome que feme sont prisé
cc et xxxv, sans dote,
Tel fu des revescuz la rote.
Jobel avoit nom li uns d’iaus
Qui fu paiens et puis fu saus.
Li sains li dist mult bonement ;
« Amis, di moi certainement,
Et de l’dire pas ne t’enuit,
Combien a que mors fustes tuit ? »
S’il dist : « cc ans a passés
Que mors fumes et plus assés. »
