Orig. – Arch. de famille de M. le comte H. C. de Meslon, à Rauzan. Communication de M. le secrétaire général du département de la Gironde.
À MONSR DE MELON[1],
Monsr de Melon, Par ce que, pour soustenir les fraiz et despence de la guerre en laquelle nous avons esté contrainctz d’entrer, pour nous preparer à une juste et necessaire defence contre les ennemys et violateurs de la paix et foy publicque, il est besoing de faire levée de deniers à la moindre foulle et oppression, et plus grand soullagement du peuple que faire se pourra, et pour ceste cause nous avons advisé de prendre les quatre decimes qui sont escheues sur les beneficiers qui sont uniz ou ne nous sont contraires, et le revenu entierement de tous les aultres, lequel nous voullons estre affermé suyvant le reiglement qui en a esté par nous faict : à ceste cause je vous prye tenir la main à Chalup, recepveur par nous commis à faire la recepte de tous deniers ecclesiasticques, à l’execution de la charge que nous luy avons donnée pour la levée et cueillette des dits deniers provenans des decimes et affermes des fruictz et revenuz des dicts ecclesiasticques et lui donner en cela tout ayde, support et confort où besoing sera. Et m’asseurant que n’y ferez faulte, je prieray le Createur vous donner, Monsr de Melon, longue et heureuse vie. D’Agen, ce xiiije juing 1577.
HENRY.
- ↑ André de Meslon, sieur dudit lieu, conseiller du roi de Navarre, maître des requêtes de son hôtel, et gouverneur de la ville de Montségur, suivant quittance du 21 septembre 1583. (B. R. cab. généal. titres originaux, art. Meslon.)