Orig. autographe. — Biblioth. impér. de Saint-Pétersbourg, Ms. 915, lettre n° 29. Copie transmise par M. Allier, correspondant du ministère de l’Instruction publique.
Monsr de Believre, Depuis vous avoyr escrit, j’ay ouy monsr de Clervant et veu la depesche que le Roy m’a envoyé par luy, par laquelle il me mande avoir ordonné à monsr le mareschal de Matignon de tirer des villes de Condom et Agen les deux compagnies qui y ont esté mises, afin que je puisse mieux, à mon plaisir, recevoir ma femme en ma maison de Nerac ; mais qu’il veut que les cinquante soldats mis dedans Basas y demeurent pour la garde de la dicte ville. Ce qui m’a fait vous envoyer ce porteur exprés, afin que vous donnés ordre promptement de faire tirer des dictes villes d’Agen et Condom les dictes compaignies, et de Basas ce qui y est par dessus les cinquante, en attendant que l’edit soit executé, afin que Sa Majesté soit obeye et satisfaicte, d’une part et d’autre, pour aussytost aprés m’acheminer en ma maison de Nerac et y faire venir ma femme, et la y recevoir comme je doy. Je vous prye derechef le faire au plus tost et faire estat de