Thresor de la langue françoise/A cheual
A cheval, Ce sont deux mots, dont on use, quand on donne signe aux gens de cheval d’une armée de monter promptement à cheval pour combattre ou desloger dont le precedent signe est Bouteselle, & sont donnez par un trompete, dont le son est prins pour lesdits mots, Celeuma equitum ad insiliendum. On en use aussi au desloger d’un train d’un Prince ou grand Seigneur, mais de bouche, pour faire monter à cheval les gens du train d’iceluy. On dit en autre signification estre bien à cheval, pour dextrement & par maistrise manier & picquer un cheval, ou avec bonne grace & contenance chevaucher un cheval. On dit par metaphore, Il est ou il parle à cheval, pour, Il est à son advantage, & il parle se sentant bien asseuré : ce qui est aussi prins pour l’avantage que l’homme de cheval a sur le pieton.