Encore aultres balades/VI

Christine de Pisan

Car de ce vueil savoir le compte

Encore aultres balades, Texte établi par Maurice Roy, Firmin Didot, 1886 (p. 276).

VI

Tu soies le trés bien venu,
M’amour, or m’embrace et me baise
Et comment t’es tu maintenu
Puis ton départ ? Sain et bien aise
As tu esté tousjours ? Ça vien,
Coste moy, te sié et me conte
Comment t’a esté, mal ou bien,
Car de ce vueil savoir le compte.

— Ma dame, a qui je suis tenu
Plus que aultre, a nul n’en desplaise,
Saches que désir m’a tenu
Si court qu’onques n’oz tel mesaise,
Ne plaisir ne prenoie en rien
Loings de vous. Amours, qui cuers dompte,
Me disoit : « Loyauté me tien,
Car de ce vueil savoir le compte ».

— Dont m’as tu ton serment tenu,
Bon gré t’en sçay, par saint Nicaise ;
Et puis que sain es revenu
Joye arons assez ; or t’apaise
Et me dis se scez de combien
Le mal qu’en as eu a plus monte
Que cil qu’ a souffert le cuer mien,^[1]
Car de ce vueil savoir le compte.

— Plus mal que vous, si com retien,
Ay eu, mais dites sanz mescontc
Quans baisiers en aray je bien ?
Car de ce vueil savoir le compte.

1. VI. — 20 A² que a