Iconologie (Cesare Ripa, 1643)/II/Fraude
Fravde.
Ovs la voyez icy auecque deux Teſtes entées ſur vn
meſme Col, l’vne deſquelles eſt d’vne perſonne ieune,
& l’autre d’vne vieille. Elle tient deux Cœurs de la
main droite, & de la gauche vn Maſque, ayant vne queuë de
Scorpion, & au lieu de pieds, les Serres d’vn Aigle. Le double
Cœur ſignifie la Trahiſon, & le Maſque la Diſſimulation dont elle vſe. I’obmets que par la queuë de Scorpion eſt denoté le
pernicieux venin qu’elle darde ; & par les Serres d’Aigle, qu’elle
eſt comparable à vn oyſeau de proye, pour ne ſe propoſer
d’autre but que de rauir l’honneur & le bien d’autruy.