Iconologie (Cesare Ripa, 1643)/II/May
May.
E mois eſt icy peint en ieune Homme, dont l’habillement
de couleur verte, eſt femé de toutes ſortes
de fleurs, dont il porte auſſi vne guirlande. Il tient
de la main droite le Signe des Iumeaux, entourré
de roſes, & de la gauche vn rameau verdoyant.
Ce mois eſt appellé May des Latins, à Maioribus, à cauſe que Romulus ayant diuiſé le peuple Romain en deux parties, compoſées de ieunes gens & de vieillards, dont les vns deuoient gouuerner la Republique par les armes, & les autres par le conſeil, il trouua bon pour memoire de cette action de donner à ce mois & au ſuiuant les noms de May & de Iuin, comme le remarque Ouide.
Par les fleurs de ſa guirlande & de ſa robe verte, eſt ſignifiée la beauté des prez, des colines, & des champs, par qui toutes les choſes dumonde, qui ont vne ame ou vegetatiue, ou ſenſitiue, ou raiſonnable, ſont comme charmez, & duierſement eſmeus à ſe reſioüir.
Quant au Signe des Iumeaux qu’il porte, c’eſt pour monſtrer que la force du Soleil ſe redouble en ce mois-là. Car alors il commence à faire ſentir ſa chaleur. Auſſi eſt-il vray que comme en ce mois le Soleil ſe leue de terre de deux degrez, ainſi les choſes du monde s’accroiſſent & ſe multiplient par la generation des animaux.