Iconologie (Cesare Ripa, 1643)/II/Prudence
Prvdence.
Ette Vertu vous eſt figurée par vne venerable
Dame, en l’vn des bras de laquelle eſt enlacé vn Serpent ;
& qui tient de la main gauche vne Teſte de
mort qu’elle contemple, outre qu’en ſon ſein ſe voit
vn Oeil tout eſclattant de lumiere. La Teſte de mort ſignifie
que pour s’acquerir la vraye Prudence, il importe beaucoup de
conſiderer touſiours la fin des choſes ; & l’Oeil demonſtre le
meſme. Pour ce qui eſt du Serpent, l’on ſçait aſſez qu’il eſt vn
ſymbole de cette Vertu dans les ſainctes Lettres, où nous ſommes
exhortez à eſtre prudens comme les Serpens.