Le Disciple de Pantagruel/1875/24
Le Disciple de Pantagruel (Vers 1538)
De l’isle où croissent les espées, pongnards, cousteaux gratis et pelis de toutes sortes.
CHAPITRE XXIIII.
Il y a aussi d’aultres arbres qui ne sont pas grandz, lesquelz portent des cosses longues et courtes, dedans lesquelles croissent les espées, les estocz, verduns, sang de dé, pongnardz, courtes dagues, et les cousteaux grandz et petiz de toutes sortes.
Et quand on se veult servir, il ne fault que coupper ung peu de la cosse, et lors vous trouverez les cousteaux et aultres bastons, telz que vous vouldrez, soit pour plumer du fromaige, pour chiqueter ou coupper voz habiz, voz chausses ou voz pourpoinctz, comme je voy faire souvent à ung tas de folz qui n’ont pas de pain à mettre en leurs dens ; mais telz habiz leurs sont bons pour passer leur yver.