Les Œuvres de François Rabelais (Éditions Marty-Laveaux)/LeCinquiemeLivre/11

Rabelais

Les Œuvres de François Rabelais (Éditions Marty-Laveaux)

Alphonse Lemerre, 1873 (Tome III, p. 44-48).

Comment nous paſſames le Guichet habité par Grippeminaud
archiduc des Chats-fourrez^[1].

Chapitre XI.

De là^[2] paſſames condemnation^[3], qui eſt vne autre Iſle toute deſerte : paſſames auſſi le guichet, auquel lieu Pantagruel ne voulut deſcendre, & fiſt treſbien : car nous y fuſmes faits priſonniers, & arreſtez de faiſt par le commandement de Grippe-minaud archiduc des Chats-fourrez. Parce que quelqu’vn de noſtre bande voulut vendre à vn ſerrargent des chapeaux de Caſſade^[4]. Les Chats-fourrez ſont beſtes moult horribles & eſpouuentables : ils mangent les petits enfans, & paiſſent ſus des pierres de marbre^[5]. Aduiſez beuueurs s’ils ne deuroient bien eſtre camus. Ils ont le poil de la peau non hors ſortant, mais au dedans caché^[6] : & portent pour leur ſymbole & deuiſe tous & chaſcun d’eux vne gibbeciere ouuerte : mais non tous en vne maniere : car aucuns la portent attachee au col en eſcharpe, autres ſus le cul, autres ſus la bedaine, autres ſur le coſté, & le tout par raiſon & miſtere. Ont auſſi les griphes tant fortes, longues, & aſſerees, que rien ne leurs eſchappe, depuis qu’vne fois l’ont mis entre leurs ſerres. Et ſe couurent les teſtes aucunefois de bonnets à quattre gouttieres, ou braguettes : autres de bonnets à reuers^[7], autres de mortiers, autres de caparaſſons mortifiez. Entrans en leur tapinaudiere nous diſt vn gueux de l’hoſtiere, auquel auons donné demy teſton : gens de bien Dieu vous doint de leans bien toſt en ſanté^[8] ſortir : conſiderez bien le minois de ces vaillans pilliers, arboutans de iuſtice Grippeminaudiere. Et notez que ſi viuez encore ſix Olympiades & l’aage de deux chiens, vous verrez ces Chats-fourrez ſeigneurs de toute l’Europe & poſſeſſeurs pacifiques de tout le bien & dommaine qui eſt en icelle, ſi en leurs hoirs, par diuine punition, ſoubdain ne deporiſſoit le bien & reuenu par eux iniuſtement acquis : tenez-le d’vn gueux de bien^[9]. Parmy eux regne la ſexte eſſence^[10], moyennent laquelle ils grippent tout, deuorent tout, & conchient tout : ils brullent, eſclattent, decapitent, meurdriſſent, empriſonnent, ruinent & minent tout ſans diſcretion de bien & de mal. Car parmy eux vice eſt vertu appellee : meſchanceté eſt bonté ſurnommee : trahiſon a nom de feauté : larrecin eſt dict liberalité : pillerie eſt leur deuiſe, & par eux faicte, eſt trouuee bonne de tous humains, exceptez moy les heretiques, & le tout font auec ſouueraine & irrefragable authorité. Pour ſigne de mon pronoſtic aduiſerez que leans ſont les mangeoires au deſſus des raſteliers. De ce quelque iour vous ſouuienne. Et ſi iamais peſtes au monde, famine, ou guerres, vorages, catectiſmes, conflagrations, mal’heur aduiennent, ne les attribuez, ne les referez aux coniunctions des planettes malefiques, aux abus de la cour Romaine, ou tyrannie des Roys & Princes terriens, à l’impoſture des caphars, heretiques, faux prophetes, à la malignité des vſuriers, faux monnoyeurs, rongneurs de teſtons, n’a l’ignorance, impudence, imprudence des medecins, cirurgiens, apoticaires, n’à la peruerſité des femmes adulteres, venefiques, infanticides : attribuez le tout à leur ruine indicible^[11], incroiable, ineſtimable meſchanceté, laquelle eſt continuellement forgee & exercee en l’officine des Chats-fourrez : & n’eſt au monde congnue, non plus que la cabale des Iuifs : pourtant n’eſt elle deteſtee, corrigee, & punie, comme ſeroit de raiſon. Mais ſi elle eſt quelque iour miſe en euidence, & manifeſtee au peuple, il n’eſt, & ne fut Orateur tant eloquent, qui par ſon art le retint : ne loy tant rigoureuſe & drachonique, qui par crainte de peine le gardaſt : ne magiſtrat tant puiſſant qui par force l’empeſchaſt, de les faire tous vifs là de dans leur rabuliere felonnement bruſler. Leurs enfans propres Chats-fourrillons & autres parens les auoyent en horreur & abomination. C’eſt pourquoy auſſi que Hannibal eut de ſon pere Amilcar, ſouz ſolennelle & religieuſe adiuration, commandement de perſecuter les Romains, tant qu’il viuroit : ainſi ay-ie de feu mon pere inionction roy hors demeurer, attendant que là dedans tombe la fouldre du Ciel, & en cendre les reduiſe comme autres Titanes, prophanes, & theomaches : puiſque les humains tant & tant ſont des corps endurciz, que le mal parmy eux aduenu, aduenent & à venir ne recordent, ne ſentent, ne preuoyent : ou le ſentens n’oſent, ne veulent, ne peuuent les exterminer. Qu’eſſe cela, dill Panurge, ha non non ie n’y vois pas par Dieu, retournons. Retournons dis-ie de par Dieu. Ce noble gueux m’a plus fort eſtonné, que ſi du Ciel en automne. euſt tonné^[12]. Retournans trouuaſmes la porte fermee : & nous fut dict, que là facilement on y entroit, comme en Auerne^[13]. A iſſir reſtoit la difficulté, & que ne ſortirions hors en maniere que ce fuſt, ſans bulletin & deſcharge de l’aſſiſtance^[14] : par ceſte ſeule raiſon, qu’on ne s’en, va pas des foyres, comme du marché, & qu’auions les pieds pouldreux^[15]. Le pis fut, quant paſſames le Guichet. Car nous fuſmes preſentez pour auoir noſtre bulletin & deſcharge, deuant vn monſtre le plus hideux, que iamais fut deſcrit. On le nommoit Grippe-minaud. Ie ne vous le ſçaurois mieux comparer, qu’à Chimere, ou à Sphinx & Cerberus, ou bien au ſimulachre d’Oſiris, ainſi que le figuroyent les Egyptiens, par trois teſtes enſemble ioinctes : ſauoir eſt d’vn lyon rugient, chien flattant, & d’vn loup baiſlant, entortillees d’vn dragon ſoy mordant la queue, & de rayons ſcintillans à l’entour. Les mains auoit plaines de ſang, les griphes comme de harpye, le muſeau à bec de corbin, les dens d’vn ſanglier quadrannier, les yeux flamboyans comme vne gueule d’enfer, tout couuert de mortiers entrelaſſez de pillons^[16], ſeulement apparoſſoyent les griphes. Le ſiege d’iceluy & de tous ſes collateraux Chats garaniers, eſtoit d’vn long rattelier tout neuf, au deſſus duquel par forme de reuers^[17] inſtablees eſtoient mangeoires fort amples & belles, ſelon l’aduertiſſement du gueux. A l’endroit du ſiege principal, eſtoit l’image d’vne vieille femme, tenant en main dextre vn fourreau de faucille^[18], en feneſtre vne ballance, & portant bezicles au nez. Les coupes de la ballance eſtoient de deux gibbeſcieres veloutees : l’vne pleine de billon, & pendente, l’autre vuide & longue eſleuee au deſſus du treſbuchet. Et ſuis d’opinion que c’eſtoit le pourtraict de iuſtice Grippe-minaudiere, bien abhorrente de l’inſtitution des antiques Thebains : qui erigeoyent les ſtatues de leurs Dicaſtes & iuges apres leur mort en or & argent, en marbre ſelon leur merite, toutes ſans mains. Quant fuſmes deuant luy preſentez ne ſçay quelle ſorte de gens, tous veſtus de gibbeſcieres, & de ſacs, à grans lambeaux d’eſcritures, nous firent ſus vne ſelette aſſeoir. Panurge diſoit, gallefretiers mes amis ie ne ſuis que trop bien ainſi debout : auſſi bien eſt elle trop baſſe pour homme qui a chauſſes neuſues, & court pourpoint. Aſſoyez vous là, reſpondirent ils, & que plus on ne vous le dit. La terre preſentement s’ouurira, pour tous vifs vous engloutir ſi faillez à bien reſpondre.

---

1. Grippeminaud archiduc des Chats-fourrez. La Fontaine s’est souvenu de ce chapitre dans Le Chat, la Belette & le petit Lapin, où il peint Raminagrobis comme

   Un ſaint homme de chat, bien fourré, gros & gras,
   Arbitre expert ſur tous les cas.

   On en connaît le dénouement :

   Grippeminaud le bon apoſtre
   Jettant des deux coſtez la griffe en meſme temps.
   Mit les plaideurs d’accord en croquant l’un & l’autre.

   Pascal (t. I, p. 79, collection Lemerre), parlant de l’appareil extérieur qui ajoute à l’autorité des magistrats, mentionne « leur hermine, dont ils s’emaillotent en chafourés. »
2. De là. Ms. : Quelques iours apres, ayans failly pluſieurs foys à faire naufrage, nous…
3. Paſſames condemnation. Jeu de mots comme dans le quart livre (t. II, p. 310, l. 6) : « Paſſaſmes Procuration. »
4. Voulut… Caſſade. Ms. : Auoit battu le chicanoux, paſſant Procuration.
5. Pierres de marbre. Allusion à la table de marbre du Palais.
6. Au dedans caché. Allusion à la doublure de fourrure des robes.
7. Bonnets à reuers. Ms. : Bonnetz à treſues de cul.
8. Santé. Ms. : Saulueté.
9. Et bien. Lisez : de bien.
10. Sexte eſſence. « Les chimistes jusqu’au temps de Rabelais n’avaient analysé la matière que jusqu’à la cinquième essence. Rabelais en imagine une sixième annexée aux gens de palais, et qui consiste à gripper, dévorer, etc. » (De Marsy)
11. A leur ruine indicible. Ms. : A l’enorme, indicible. Ce qui donne un sens beaucoup plus clair.
12. Euſt tonné. Ce qui précède forme deux vers qui semblent imités de Marot (Epiſtre au Roy pour le deliurer de priſon) :

    Incontinent qui fut bien eſtonné ?
    Ce fut Marot, plus que s’il euſt tonné.

13. Auerne. Ms. : Tauerne.
14. L’aſſiſtance. Ms. : La ſtance.
15. Pieds pouldreux. On appelait pieds pouldreux les petits marchands étrangers qui allaient vendre de foire en foire et ne pouvaient se retirer sans remplir certaines formalités. Voyez Du Cange, Glossaire, au mot Pedepulverosi.
16. Mortiers entrelaſſez de pillons. Jeu de mots. Les mortiers, qui sont les coiffures des juges, font penser l’auteur aux pilons qu’il écrit pillons comme l’impératif du verbe piller.
17. Reuers. Ms. : Rauier ; qui donne un sens bien préférable.
18. Faucille. Symbolisant ce qui est de travers, comme l’épée que tient la Justice désigne au contraire ce qui est droit. On disait en plaisantant :

    Tout auſſi droit qu’vne faucille.

    (La Reſurrection de Ienin Landore, II, p. 27)