Les Œuvres de François Rabelais (Éditions Marty-Laveaux)/LeCinquiemeLivre/3
Comment en l’Iſle ſonnante n’eſt qu’vn Papegaut.
Chapitre III.
ors demandaſmes à maiſtre Aeditue veu la multiplication de ces venerables oiſeaux en toutes
leurs eſpeces, pourquoy là n’eſtoit qu’vn Papegaut. Il nous reſpondit que telle eſtoit l’inſtitution premiere, & fatale deſtinee des eſtoilles. Que des Clergaux naiſſent les Preſtregaux & Monagaux ſans compagnie charnelle,
comme fait entre les abeilles d’vn ieune toreau
accouſtré ſelon l’art & pratique d’Ariſtæus[1]. Des
Preſtregaux naiſſent les Eueſgaux, d’iceux les beaux
Cardingaux, & les Cardingaux ſi par mort n’eſtoient
preuenus finiſſoient en Papegaut : & n’en eſt ordinairement qu’vn, comme par les ruches des abeilles
n’y a qu’vn roy, & au monde n’eſt qu’vn ſoleil.
Iceluy decedé en naiſt vn autre en (on lieu de toute la
race des Cardingaux, entendez touſiours ſans copulation charnelle. De forte qu’il y a en celle eſpece
vnité indiuiduale, auec perpetuité de ſucceſſion, ne
plus ne moins qu’au Phœnix d’Arabie. Vray eſt
qu’il y a enuiron de deux mil ſept cens ſoixante lunes, que furent en nature deux Papegaux[2] produits, mais ce fut la plus grande calamité qu’on vit onques en ceſte iſle. Car, diſoit Aeditue, tous ces oiſeaux roy ſe pillerent les vns les autres, & s’entreplauderent ſi bien ce temps durant, que l’Iſle periclita d’eſtre ſpoliee de ſes habitans. Part d’iceux adheroit à vn & le ſouſtenoit : part à l’autre, & le defendoit, demeurerent part d’iceux muts comme poiſſons & onques ne chanterent, & part de ces cloches comme interdire coup ne ſonna. Ce ſeditieux temps durant à leur ſecours euoquerent Empereurs, Rois, Ducs, Monarques[3], Comtes, Barons & communautez du monde qui habite en continent & terre ferme, & n’eut fin ce ſchiſme & ceſte ſedition qu’vn d’iceux ne fut toUu de vie, & la pluralité reduide en vnité.
Puis demandaſmes qui mouuoit ces oiseaux à ainſi ſans celle chanter. Aedicue nous reſpondit que c’eſtoient les cloches pendantes au deſſus de leurs cages. Puis nous dit, voulez vous que preſentement ie face chanter ces Monagaux que voyez là bardocucullez d’vne chausse d’hypocras comme vne allouette ſauuager. De grace, reſpondiſmes nous. Lors ſonna vne cloche ſix coups ſeusement, & Monagaux d’accourir, & Monagaux de chanter. Et ſi, diſt Panurge, ie ſonnoye celle cloche, feray-ie pareillement chanter ceux qui ont le plumage à couleur de haran ſoret ? Pareillement, reſpondit Aeditue. Panurge ſonna, & ſoudain accoururent ces oiseaux enfumez & chantoient enſemblement : mais ils auoient les voix rauques & mal plaiſantes, Aussi nous remonſtra Aeditue qu’ils ne viuoient que de poisson, comme les Herons & Cormorans du monde, & que c’eſtoit vne quinte eſpece de Cagaux, imprimez nouuellement. Adiouſta d’auantage qu’il auoit eu aduertiſſement par Robert valbringue, qui par là n’agueres eſtoit paſſé en reuenant du pays d’Affrique, que bien toſt y deuoit auoler vne ſexte eſpece leſquels il nommoie Capucingaux, plus triſtes, plus maniaques[4], & plus faſcheux qu’eſpece qui fuſt en toute l’Iſle. Affrique, diſt Pantagruel, eſt couſtumiere touſiours choſes produire nouuelles & monſtrueuſes[5].
- ↑ Ariſtæus. Voyez Virgile, Géorgiques, liv. IV, v. 318. Ce passage est reproduit presque textuellement plus loin, p. 170.
- ↑ Deux Papegaux. C’est très probablement au grand schisme de 1379, causé par Urbain VI siégeant à Rome et par le prétendu Clément VII siégeant à Avignon, qu’il est fait allusion ici. Il est vrai que le calcul des lunes, recommencé de cent manières par les commentateurs, ne correspond pas à cette époque ; mais il ne faut pas le prendre trop au sérieux, et d’ailleurs il y a un environ, qui sauve tout.
- ↑ Monarques. Ms. : Marquis.
- ↑ Maniaques. Ms. : Momiacques.
- ↑ Nouuelles & monſtrueuſes. Voyez ci-dessus, p. 105, note sur la l. 11 de la p. 62.*
* Comme aſſez ſçauez que Africque aporte touſiours quelque choſe de noueau. Ce dicton est répété au cinquieſme livre (t. III, p. 19) : « Affrique, diſt Pantagruel, eſt couſtumiere touſiours choſes produire nouuelles & monſtrueuſes. » Pline nous apprend que c’était un proverbe vulgaire de Grèce : « Semper aliquid novi Africam afferre. » (Hist. Natur., VIII, 16)