Les Chroniques de Sire Jean Froissart/Livre I, Partie I/Chapitre CCLX
CHAPITRE CCLX.
Ainsi étoit le châtel d’Aiguillon et ceux qui le défendoient assaillis par plusieurs manières ; car presque toutes les semaines on y trouvoit et avisoit aucune chose nouvel. Et aussi ceux du châtel, pour eux défendre, ravisoient aucune chose à l’encontre. Le siége durant devant Aiguillon, avint par plusieurs fois que messire Gautier de Mauny s’en issit hors, atout cent ou cent vingt compagnons, et en alloient par outre la rivière de leur côté fourrager ; et, voyans ceux de l’ost, ramenoient souvent grand’proie ; dont les François avoient grand ennui.
Et avint un jour que messire Charles de Montmorency, maréchal de l’ost, chevauchoit et avoit bien cinq cents compagnons tous à cheval, et ramenoit grand’proie en leur ost, qu’il avoit fait recueillir sur le pays, pour avitailler l’ost ; si s’encontrèrent dessous Aiguillon ces deux chevauchées. Messire Gautier de Mauny ne vouloit mie refuser, combien qu’il eût le moins de gens ; mais se férit tantôt en ces François ; et cils entre eux. Là eut dur hutin et fort, et maint homme renversé par terre, mort et blessé ; et y firent les deux capitaines grands appertises d’armes, et vaillamment se combattirent. Toutes voies les Anglois en eussent eu le pire, car les François étoient bien cinq contre un ; mais les nouvelles vinrent dedans Aiguillon que leurs compagnons se battoient et qu’ils n’étoient mie bien partis aux François. Adonc issirent eux, qui mieux mieux, et le comte de Pennebroch tout devant : si vinrent tout à point là à la mêlée, et trouvèrent messire Gautier de Mauny qui étoit à terre, enclos de ses ennemis, et y faisoit merveilles d’armes : si fut tantôt rescous et remonté que le comte de Pennebroch fut venu. Or vous dirai que les François avoient fait. Entrementes que leurs gens se combattoient et ensonnioient les Anglois, ils chassèrent leur proie outre, et la mirent à sauveté : autrement ils l’eussent perdue ; car les Anglois qui issirent hors d’Aiguillon, pour secourir leurs compagnons, le comte de Pennebroch, messire Franke de Halle, messire Hue de Hastingues, messire Robert de Neuf-Ville et les autres se portèrent si vaillamment, que tantôt ils espartirent ces François, et rescouirent tous leurs compagnons, prirent plusieurs prisonniers, et à grand meschef se sauva messire Charles de Montmorency, qui s’en revint arrière ainsi que tout déconfit ; et les Anglois retournèrent dedans Aiguillon.